23 سبب يخلوك تعمل website - Touch for IT solutions
23 سبب يخلوك تعمل website

23 سبب يخلوك تعمل website

انا قبل ما اتكلم عن ال 23 سبب اللى ممكن يخلوك تعمل موقع على الانترنت عايز اقولك شوية حاجات بما انك بتقرا المقالة دي يبقى انت موجود على الانترنت طب انت تعرف انت رقم كام من مستخدمى الانترنت ؟ طب انت عارف أصلاً عدد مستخدمى الانترنت كام؟ او تعرف فى كام WEBSITE على شبكة الانترنت؟ , عدد مستخدمى الانترنت: 3,145,127,436 أكتر من تلاتة مليار user. عدد الـ Websites : 957,797,759 رقم قرب على المليار website دلوقتى تعالى نعرف ايه هى الاسباب اللى تخليك تعمل website لشغلك او شركتك

 
1- عايز توصل لناس كتير
 لو عايز شغلك او شركتك توصل لعدد كبير من الناس اللى ممكن تكون مهتمة بشغلك او شركتك و أظن ان مفيش مكان فى الكون هيكون فيه العدد الكبير ده من الناس زى الانترنت علشان مستحيل تلاقى برنامج على التليفزيون بيشوفه عدد كبير جدا من الناس غير برنامج (رامز واكل الجو) بس ده مش معناه ان فى ناس برة مصر او الدول العربية مهتمين ببرنامج زى ده بالعكس انت ممكن تلاقى اكبر عدد من المشاهدين للبرنامج ده 60 مليون مثلا او حتى 100 مليون و ده برضه مش معناه ان فرصتك ان الناس تشوف إعلانك او منتجك كبير علشان ببساطة الناس بتقلب القناة فى الاعلانات  نرجع تانى للانترنت عدد مستخدمى الانترنت اكتر من 3 مليار بني ادم ده غير انهم من جنسيات مختلفة و ده السبب الثانى.

2- انت مين ؟ ( About, Vision & Mission ):
 لو كل العملاء بتوعك عارفين شركتك و تاريخها و أهدافها يبقى تمام متعملش website لكن لو ميعرفوش، الموقع بتاعك هيخلى الناس تعرف انت مين ايه هي خبراتك فى الـIndustry اللى انت فيها و أيه هى أهدافك و رؤيتك عن المجال بتاعك كل ده ممكن يزود الثقة بينك وبين العميل و يخليه عارف عنك قبل ما يتعامل معاك و يشترى منك و يكون مكون إنطباع عن شركتك قبل ما يتصل بيك.

3- مش عايز تكون شركة Local:
 Local هنا مش معناها وحش لا انا قصدى انك عايز تشتغل على السوق المحلى بس ، علشان انت لو عايز توصل لكل العالم لازم تعمل website علشان توصل لكل العالم متخطياً الحدود، الـ website هيخلى المنتج بتاعك متشاف فى كل أنحاء الكرة الارضية و انت فى مكانك (فى عام 1999 أنشأ Jack Ma بشقته في مدينة هانغتشو موقع Alibaba.com و يعتبر دلوقتى اكبر موقع صينى و موقع تسوق فى العالم). بس حتى لو كنت عايز تشتغل Local لازم تعمل website علشان عدد مستخدمى الانترنت فى مصر عددهم اكتر من اربعين مليون (40,311,562) عام 2014 بزيادة 10% عن 2013 و مستحيل توصل للعدد ده إلا لو انت اكبر من شركة Vodafone.

4- وفر فلوس الإعلانات:
 أوعى تعمل website لو معاك فلووووووووس كتيييييييييير روح هات مخرج و كام بنت حلوة و إطلع على شرم الشيخ و صور إعلان و نزله فى وقت المسلسلات فى رمضان و ابقى قابلنى  او روح لطارق نور و هو هيظبطك ;) لكن لو معاكش فلوس او حتى معاك وفرها و إعمل Website علشان من خلاله تقدر تبيع منتجاتك او شغلك او خدماتك او حتى تبيع نفسك (أبيع نفسى بصوت مرجان أحمد مرجان) يعنى تعمل موقع بدل الCV بتاعك و لما تحب تقدم على شغل ابعتلهم website و هيكون عليه كل البيانات عنك و كل خبراتك السابقة و أكيد هيفرق كتير من الCV التقليدى. من الآخر كده الـ Website افضل Business Card ممكن تكون معاك.

5- عايز إعلانك يوصل للزبون المستهدف:
اعمل إعلان زى ما قولت من شويه و انا أضمنلك انه يوصل لكل الناس الا اللى انت عاوزه يشترى علشان ممكن اللى عايز يشترى يكون بيدور عليك فى مكان تانى  لكن لو انت موجود على الانترنت من خلال website تقدر توصل للى بيدور عليك بسهولة.(يوميا يتم 3,575,058,299 تلاتة ونص مليار عملية بحث على google بس) يعنى نسب انك توصل للناس أسهل و فى اى مكان و كمان فى أى وقت.

6- لو بتشتغل 24 / 7:
 انت محتاج لـ website حتى لو انت فاتح شركتك او محلك 24 ساعة فى اليوم 7 ايام فى الاسبوع علشان انت ممكن توصل لعدد اكبر زى ما قولت قبل كده و كمان هزود العلاقة بينك و بين عميلك و هيسهل علية يعرف الجديد اللى عندك، و لو انت بتقفل يبقى لازم يكون عندك website علشان الناس تلاقيك ديماً فاتح حتى فى أيام الأجازات. وده هيخليك عامل اعلان 24 ساعة ببلاش و كمان هيكون فى تواصل مع عملائك بشكل اسرع و ده انت هتعرفه من النقط اللى جاية.
 
7- عندك E-mail ع الفيس:
 يعنى مثلا انت ممكن يكون عندك email على (Gmail – Yahoo – outlook ) او أى خدمة بريد مجانية بس ده مش بتاعك مش ملكك ممكن يتعملك Block فى اى وقت و كمان ممكن الخدمات دى تقف لأى سبب فى الدنيا من غير أى تعويض ليك لكن لو كان عندك Domain خاص بيك و موجود عليه email ليك ده هيكون ملكك و البيانات اللى عليه هتكون متأمنه كويس و محدش يقدر يقفلك الEmail بتاعك لأى سبب و شركات الـ Hosting بتوفر خطط كتير للموضوع ده. وهنا انت تقدر تحط Email بتاعك على الموقع و هيكون أكتر احترافية لما يكون على نفس الـ Domain بتاع الـ website بتاعك زى الـ Email بتاعى على Touch-corp.com هو islam@touch-corp.com. و على فكرة مفيش حاجة اسمها (عندك email ع الفيس) علشان الـFacebook مش خدمة بريد ده Social media.

8- Landing page (ملهاش ترجمة):
فى ناس بتسميها صفحة الهبوط (هبوط فى معاميعك حزلئوم إستايل) الغرض منها هو شد انتباه العميل للمنتج معين او لخدمة معينة (تعتبر من أهم عناصر E-Marketing) عن طريق تقديم عرض او تخفيض على الخدمة او السلعة و ده مش ممكن يتوفر غير على الـ Website إلا لو بتطبع فلاير و بتوزعه فى الإشارات او بعد صلاة الجمعة زى عروض كارفور (كارفور عنده موقع ) و ممكن تستخدم الـ Landing page فى انك تجمع contacts من العملاء او الزوار بتوعك.
دلوقتى انا هفترض انك عملت موقع و وصلت للناس اللى على الانترنت ايه اللى ممكن يحصل على الموقع بتاعك.

9- رد انت يا حسين FAQ (Frequently asked questions):
لو انت فاضى و بترد على كل الأسئلة اللى بتتسئل عن الشغل بتاعك بنفسك و بتجاوب لكل عميل نفس الاجابات من غير ما تزهق يبقى متعملش website - (FAQ) المقصود بيها انك تجمع الاسئلة الاكثر شيوعاً عن المنتجات او الخدمات اللى بتقدمها و ترد عليها و تحطها على الموقع و ده هيوفر على الزوار بتوعك الوقت و عليك انت المجهود فى انك تجاوب على الأسئلة دى و يبقى عنك وقت ترد على أسئلة أهم من العملاء الفعليين.

10- عايز تحافظ على علاقاتك بالعملاء بتوعك :
و جود موقع هيخليك تتواصل ديما مع عملائك بشكل أسرع و تقدر ترد عليهم و تعرف هما عايزين ايه من خلال تفاعلهم على موقعك و تقدر تعرف ايه المنتج او الخدمة اللى شغالة معاهم اكتر. وده هيخليك قريب منهم و هما كمان هيحسوا بيك و هبقوا عارفين انك بتهتم بأرائهم و هنا هيحصل ثقة بينك و بينهم و ده اللى بيدور عليه أى بياع شاطر.

11- الزبون دايماً على حق:
الموقع ممكن يكون القناة الرسمية بينك وبين العملاء بتوعك للتواصل بينكم و ده من خلال انك تعمل مكان للإقتراحات و ده هيخليك دايما عارف رأى العميل اية فى شغلك او منتجك او خدمتك – ممكن حد يقولى ده ممكن يحصل على Facebook page اسمح لى اوضح حاجة; Facebook مش بتاعك لاموأخذه ده بتاع مارك و هنا ممكن مارك يعمل اللى هو عايزه يعنى لو قفلك الصفحة و قالك اطلع بره مش هتقدر تفتح بقك  علشان كدة لازم يكون عندك Website

12- لو تقدر تفتح فرع فى كل مكان:
لو انت زى الفطيم مثلاً يبقى مش محتاج يكون عندك Website (على فكرة الفطيم عنده) علشان انت لو عندك Website تقدر تكون فاتح محل فى كل حته على الكرة الارضية و ده بأقل التكاليف.

13- دلع الزبون (المنتجات زينة فى الفاترينة):
المفروض انك بتدور على راحة العميل و بتعمل كل اللى تقدر عليه علشان تريحه و تخدمه بصورة سريعة و مريحة يعنى مثلاً لو بتعمل منتجات موسمية او خدمات موسمية (زى الحج و العمرة مثلاً) تقدر انك تعمل موقع للشركة و تعلن عن الخدمات دى و فى الحالة دى العميل بدل ما ينزل او يتصل علشان يشوف ايه الجديد عندك هيدخل على الموقع بتاعك و يشوف أخر العروض و الخدمات و التخفيضات يعنى بدل ماكانت الناس زمان تنزل تشوف الأكازيون فى عمر افندى انت هتخليه يوصل لحد عنده من غير ما يتحرك من مكانه (دلعه يا أخى).

14- سرعة فى الأداء:
لو بتقدر ترد على كل عملائك بسرعة و فى أى وقت ما تعملش website لكن لو كنت عايز تتواصل بشكل أسرع مع العملاء و بشكل مباشر، من خلال الـ Website تقدر تتواصل مع العميل بشكل مباشر عن طريق Live chat و ده ممكن يحققلك بيع بطريقة مباشرة لو كان الشخص اللى بيرد على العملاء شاطر هيزود نسبة المبيعات بشكل كبير علشان هيكون تأثيره على العميل كبير جدا لو فى إتصال مباشر. و كمان ممكن يساعد العميل المتردد بين بعض المنتجات و ايهما افضل؟ فى أنه ياخد القرار بسرعة أكبر.

15- ع السكين يا بطيخ :
لو بتبيع منتجاتك او خدماتك بطريقة ع السكين يا بطيخ انت مش محتاج website انت محتاج سكينة عارف الراجل بتاع البطيخ اللى بيقول (ع السكين يا بطيييييييخ) ده هو اللى بيبيع أكتر من الراجل بتاع (حَمار و حلاوة يا بطيخ) علشان هو بيخليك تشوف المنتج قبل ما تشترى و كمان تقدر تقول رأيك لو مش عاجبك البطيخ. انت كمان لو عندك website هتقدر تعرض منتجاتك على العملاء بتوعك و تعرف رأيهم بسرعة و ده هيساعدك انك تحسن من أدائك علشان تقدم أحسن خدمة ليهم.

16- علم العملاء بتوعك حاجة جديدة:
لو بتحب العملاء بتوعك و عايزهم يحبوك علمهم حاجة جديدة او اخترع لهم حاجة تفرق فى حياتهم و ده هو الـModern marketing أنك تأثر فى العملاء بتوعك و تخليهم مرتبطين بيك عن طريق انك بتضيف ليهم حاجة جديدة كل يوم و ده بيخليهم واثقين فيك انك أحسن واحد فى المجال ده. و هنا يبقى لازم لازم تعمل website و كمان Blog علشان الناس تتواصل معاك من خلاله و تقدر تكون معاهم كل يوم و انت بتضيف ليهم حاجات جديدة و بتعلمهم و بالتالى بتأثر فى حياتهم.

17- إستعين بصديق (Share and promote your business) :
افضل طرق التسويق الجديدة هى ان الناس هى اللى تسوقلك يعنى الناس تتكلم عنك و عن شغلك فيرشحوك لأصحابهم و جيرانهم و يا سلام لو هو بيتكلم عنك ذكر مثلاً حاجة جامدة انت عملتها معاه او علمتهاله. و ده هيخلينى أقولك على سبب ممكن يسهلك الموضوع ده.

18- الـ Social media يا منى:
الـ website هيوفرك انك تقدر تحط الـ Social media بتاعتك فى مكان واحد و ده هيسهل على الزوار انهم يعملوا Share او Recommendation للموقع بتاعك بسهوله على الـ Social media. و ده هيزود من عدد الزوار و فرص البيع.

19- محتاج تكبر شغلك :
لو كنت شايف ان حجم أعمالك كده كويس متعملش Website علشان فى فرص كتير ان حجم أعمالك يكبر و ده ممكن يحصل بأكتر من طريقة
• يعنى مثلاً ممكن تلاقى حد بيعرض عليك انك تبيع منتجاته مقابل نسبة من المبيعات بتاعته
• او تلاقى حد بيعرض عليك يحط إعلانات عندك على الموقع بتاعك.
• او شركة كبيرة تطلب منك انها تشاركك مثلا )زى Yahoo.com ماعملت مع Alibaba.com)

20- أحمى ضهرك Save your brand:
انك يكون ليك موقع علي النت يعنى عندك مكان تقدر تعبر من خلاله عن نفسك يعنى محدش يقدر ياخد الـBrand بتاعك و يتكلم بلسانه مكانك يعنى لو فى حد متقمص شخصيتك على الـSocial media و عامل صفحة بأسم شركتك ممكن يبيع من خلالها و كمان يسوء سمعتك مع العملاء (‫اعلان ZANUSSI زانوسى - سيبى نفسك لخلوصى يا مدام بوسى) كل يوم تشوف 50إعلان ليهم و بأرقام مختلفة - لكن لو عندك موقع الناس هتكون عارفة ان دى هى القناة الرسمية ليك اللى ممكن الناس تاخد منها الأخبار بتعتك او معلومات عنك او عن منتجاتك او خدماتك و أسعارها (قناة النادى الأهلى مثلا).

21- شغلك صغير و يا دوب مغطى التكاليف:
انا رأيى انه لازم يكون ليك Website على الأنترنت علشان ده هيزود فرص بيعك لو عرفت ان فى 2004 كان فى 20 مليون متسوق على الانترنت و انه وصل الى 200 مليون فى 2014 فى أمريكا بس. فرص انك تبيع منتجاتك على الانترنت اكتر بكتير من أنك تبيعها face 2 face او بطرق التسويق القديمة خصوصاً لو كنت معندكش ميزانية كبيرة للتسويق. لكن مش معنى كلامى انك يكون عندك أى موقع و السلام لأ لازم يكون عندك موقع إحترافى و حتى صغير لكن شكله حلو و معمول بإحترافية علشان ده هيزود ثقة الزوار فيك و يتعاملوا معاك على انك شركة كبيرة، وده هيديلك الفرصة انك تنافس الشركات الكبيرة و تاخد جزء و لو صغير من نصيبهم فى السوق Online.

22- وفر تكاليف طباعة Catalog لكل منتج جديد عندك:
لو تقدر تطبع Catalogs و فلاير جديد مع كل منتج او عرض جديد متعملش Website علشان الـ Website هيوفر كل التكاليف دى و هيخليك كمان تعدل فيها مع كل تعديل صغير او كبير بدون ما تخسر مصاريف طباعة جديدة و هيكون سهل على عملائك الوصول لكل المطبوعات الجديدة ليك من غير ما تبعتها ليه و تاخد وقت طويل خصوصاً لو فى بلد تانية، و يمكن فى شركات عالمية كتير ابتدت تعمل كده و ابسط مثال هى شركات الكمبيوتر انت كنت زمان لازم يكون معاك Driver CD علشان تعريفات الـ Laptop و الـ PC لكن دلوقتى انت تقدر تعمل Download لكل الـ Drivers من على موقع الشركة بكل سهولة و ده أكيد وفر فلوووووووس كتير للشركات دى كانت بتصرفها على الـ CD و DVD.

23- اختار الموظفين الصح:
آخر ميزة ممكن تاخدها لو عندك website هى انك تقدر توصل للموظفين الكويسين عن طريق الانترنت علشان فى ناس كتير بتدور على فرص عمل على الأنترنت و هنا تقدر تحصل على إختيارات كتير و توظف الموظف المناسب لشغلك بشكل أسهل كتير.
و فى الأخر إعمل website لشغلك مهما كان حجمه او حجم العمل بتاعك او حتى personal website ليك ده ممكن يوفرلك فرص أكتر من ناس تانية معندهاش website، الـwebsite مهم جداً بس مُكملاً ليه بقيت الـchannels زى الـsocial networks كلها و الـe-mail marketing كمان.
ممكن تعمل موقع ببلاش من هنا

Leave a Comment