إزاى تختار اسم النطاق للموقع بتاعك - Touch for IT solutions
إزاى تختار اسم النطاق للموقع بتاعك

إزاى تختار اسم النطاق للموقع بتاعك

إسم النطاق (domain name) الخاص بموقعك هو من أهم الحاجات فى الـ Business بتاعك عشان كده انا هتكلم عنه ف المقال ده و هديله أهمية إختيار شريك الحياة أو مكان السكن، يعنى مثلاً لو انت اتسرعت فى إختيار شريك حياتك أو المنطقة اللى هتسكن فيها ممكن تدبس و تحصل مشاكل كتير ممكن تصل للإنفصال أو تغيير السكن مثلا وتتحمل مصاريف كتير بعد كدة. عشان كده أنا هنا كتبلك list ممكن تمشى عليها وأنت بتختار أسم الدومين بتاعك و أنا قسمت الـlist الى مجموعتين الأولى (إبعد عن النقاط اللى فيها) و التانيه (نفذ النصايح اللى فيها).

إفتكر إنى قولتلك بلاش

1- بلاش أسماء البراندات

أوعى تختار أسم يكون براند و الناس كلها عارفاه و تقول ان ممكن ينوبك من الحب جانب ، يعنى مثلا تختار أسم نطاق يكون أسمه amazon.net وتفتكر إنك بالطريقة دى مكن يجيلك زوار كتير، لأ غلط عشان كده مش هينفع إنك تقنع الناس أنها تزور موقعك و لو فى حد دخل الموقع من غير ما يقصد مش هيلاقى اللى هو عايزه وده هيضر الموقع، و كمان ممكن amazon ترجع عليك بالمطالبة بتغيير اسمك عشان انت بتنتهك حقوقهم ودى النقطة الثانية.

2- بلاش حقوق الملكية الفكرية و العلامات التجارية

إبعد عن استخدام أسم يكون له حقوق ملكية يعنى trademark عشان هتحط نفسك تحت المسائله القانونية، خلى ديما اسم الـ Domain خاص بك و علامتك التجارية، و حاول يكون الاسم مميز و مش متداول عشان يفيدك و الSEO  بعد كده.

3- بلاش تكتب كلمة غلط

إنك تكتب الاسم غلط فى التهجئة عشان تسهل على نفسك او عشان تلاقى أسم متاح ده ممكن يسبب مشاكل كتير بعد كدة عشان ممكن الناس تكتب الاسم صح، مثلاً إنت عايز دومين بالشكل ده goodstuff.com بس مش متاح، وإنت اختارت مكانه goodstuf.com الحركة دى يطير فيها رقاب، ليه؟؟؟ عشان معظم الناس هتكتب بدون وعى الكلمة الصح و هيكون عليك إنك تنبه الناس انك بتكتبها كده goodstuf، و فى هنا مشكلة كمان فى الاسم ده ان ممكن الناس تتلخبط بين stuff و staff !!!، مش كدة ولا ايه؟ شوف اللى بعده

4- بلاش اسم يكون confusing

زى ما قلت فى النقطة اللى فاتت لو انت بتقول لحد فى التليفون stuff ممكن يكتبها staff لو سمعها بشكل مش صحيح عشان كده ابعد عن الكلمات اللى الناس بتكتبها بشكل غلط مثلاً فى غلط شائع فى كلمة swimming ناس كتير بتكتبها swiming وده ممكن برضو يسبب مشاكل كتير.

5- بلاش الأرقام

ليه بلاش الارقام عشان ببساطة انت ممكن تختار دومين زى طموح بيتكتب كده tmou7.com وده عشان احنا كعرب بنكتب 7 على انها (ح) بس لو أنا بكلم واحد أجنبي و بقوله الموقع بالحروف T M O U 7 هو ممكن يكتب seven بدل 7.

6- بلاش الأسماء المحلية

و هنا هستشهد ب tmou7.com انا لما حجزت الدومين ده كان الاسم عاجبنى جدا و دى كانت غلطة كبيرة عشان لازم ابص لقدام هل انا بستهدف سوق محلى فقط ولا ممكن اوصل للسوق العالمى و هنا الاسم هيلعب دور عشان لو الاسم محلى او مفهوم للعرب بس مش هيكون مفهوم لبقية العالم و لازم توضح بقى معنى الاسم ايه عشان توصل للناس وده مثلا اللى حصل مع مكتوب (maktoob.com) تم انشائه عام  1998 على يد فريق عربى مقرهم الاردن، و كان فى منه لغتين عربى وإنجليزى لكن موصلش للعالم كله زى موقع تانى موجود اسمه (mail.com) و اللى أصله ألمانى لكن الاسم كان عبقرى و جلوبال و مفهوم فى كل العالم، وعشان كده ابعد عن الأسماء المحلية قدر الامكان.


قبل ما أبداء فى المجموعة التانية ممكن تكون وقعت فى مشكلة من المشاكل اللى فوق و عايز تغير اسم الدومين بتاعك، ممكن جدا تعمل كده بس إقرأ المقال ده الاول (إذاى تغير اسم الـ Domain name) من هنا


إعمل الصح

1- إكتب name list

إكتب  List بالاسماء اللى ممكن تختارها و تكون قريبة من المجال اللى إنت شغال فيه أو بتعبر عنه، لكن إذا كان عندك برند و موجود بالفعل اكتب List بطرق مختلفة لإسم البراند بتاعك مثلاً انت عندك مطعم برجر اسمه Burger Home ممكن تكتبه بالشكل ده burgerhome.com او theburgerhome.com او burger-home.com …. و هكذا و إختار الافضل و المتاح.

2- استخدم إختصار

يفضل إنك تختار اسم أقل من 8 حروف عشان يكون سهل و مش طويل يعنى مثلاً كان عندنا عميل عنده مدرسة المدرسه أسمها (International modern school Sayed Galal) و كان حاجز دومين بالشكل ده (internationalmodernschool.com) متخيل الاسم طويل قد ايه و كمان ممكن الناس تكتبه بشكل غلط عشان طويل جدا و مش سهل فكان الحل إننا عرضنا عليه إنه يختار أسم تانى و هنا اختصرنا أسم المدرسة فى (imssg.net) وده كان اسهل كتير على العملاء بتوعه.

3- إختار الأسماء السهله

لو لسه بتختار اسم لشركتك و للدومين إختار الاسماء السهله و البسيطة فى الكتابة او التذكر مثلاً كلمة civilization بلاش، دور على حاجه اسهل و إبعد عن الكلمات الصعبة على المخ او التهجئة فى اختيار اسم النطاق .

4-  المحتوى بيقول ايه؟

لازم إسم النطاق يكون بيعبر عن المحتوى بتاع الموقع يعنى تختار إسم يدل على ما يحتويه الموقع عشان ما يحصلش confusion عند الزوار.

5- إختار إسم يخدم SEO

أسم يكون بيسهل عليك عملية الـ SEO زى فتكات أسم صعب يتكرر و فريد ده يخليه فى محركات البحث واخد حقه وزياده و صعب ينافسه عليها حد، و مثلاً booking.com لو انت حجزت booking.net مش هتوصل لحاجه معاه و كل كلمات البحث تخدمه هو.

الـ Tool  دى هتفيدك فى إختيار الاسم بشكل يساعد الـSEO من هنا

6- إكتب إسمك ثلاثى

لو انت عايز تعمل Blog أو Personal Branding يفضل إستخدام اسمك انت كإسم دومين مش أى حاجة تانية عشان الناس بتدور عليك بإسمك زى Ahmed-saif.com لو كتبتها فى محركات البحث هيظهر بسهوله لو حتى كتبتها بالعربى.

7- إختار .com

انا انصحك تختار اسم الـ yourdomainname.com عشان الـ com. بيكون اكثر انتشاراً بنسبة 75% من عدد المواقع على الانترنت، و لكن انت ممكن تختار (net ,.org , .co) او me. لو هتعمل Blog شخصية، ممكن  من الفيديو ده تعرف اكتر عنهم و إزاى تستخدمهم من هنا.


و فى النهاية بعد ما تختار إسم الدومين لازم تشتريه بسرعة عشان ممكن بكرة ميكونش موجود حتى لو مش هتعمل الموقع بتاعك دلوقتى إحجز النطاق الان.

Leave a Comment